Бирото за лекови најверојатно уште утре ќе го добие новиот директор што ќе го замени досегашниот Илчо Захариев, кој на последните локални избори е избран за градоначалник на Штип.
Во кабинетот на министерот Никола Тодоров велат дека не знаат кого Владата ќе го постави да раководи со ова многу стратешко место во здравството. Во недостаток на официјални податоци во јавноста веќе се шпекулира со неколку имиња од фармацевската фела.
Се споменува името на неговата колешка Марија Коковалиева која го заменуваше за време на изборите, како и уште две – три други фармацевтки од Бирото, една од нив блиска до сопственик на позната градежна фирма во државата.
Но, едно од најспомнуваните варијанти за можен наследник на Захариев, е Анета Минова советник за здравство во кабинетот на премиерот Груевски, по професија фармацевт. Захариев рече дека незнае кој во иднина ќе раководи со лековите, но за НОВА изјави дека сака тоа да биде некој од вработените во Бирото за лекови.
Захариев во директорската фотеља беше цели седум години. Беше познат по тоа што секој ден патуваше на релација Штип-Скопје, тргнувајќи во четири часот наутро за веќе во 6 и 30 да биде во министерството иако работното време почнува во осум часот.
Во последните четири години со своето возило поминал 360.000 километри. „Кога ќе си ја завршите работата до осум часот наутро, после тоа може да водите љубов“ во шега вели Захариев. За себе вели дека работата ја држел под конец, но за него се врзуваат и неколку анегдоти.
Една од нив е кога во министерството настана недоразбирање и хуманитарната помош наместо за настраданите во Чиле заврши во Ирак, по што мораа да ја враќаат назад. Скандалозен беше и случајот со индиските цитостатици од кои на болните им паѓаше косата, па ги заменија со романски кои не се покажаа како подобри.
Како градоначалник Захариев ветува дека за време на својот мандат штипјани ќе ги подмлади, пред се како добар градоначалник во комбинација со неговите билки.
Во наредните четири години сите патишта ќе водат во Штип изјави за Нова, Захариев.