Австрија, Германија и Италија се земјите кои досега најмногу инвестирале во српското стопанство, а не „доброчинителот“ и „големиот пријател“ Владимир Путин и неговата Русија, се вели во анализата на српски „Телеграф“ под назив „Дали Русите навистина се нашите најголеми браќа“.
Од сите странски инвестиции кои влегле во Србија, која веќе подолго време се обидува да го развие стопанството, да го зголеми доходот и да ги вработи луѓето, а се работи за инвестиции кои вкупно изнесуваат 18 милијарди евра, Русија учествувала со 3.6 отсто односно со 650 милиони евра.
Црна Гора која е далеку помала од Русија и посиромашна, пресметано во државното богатство и бројот на жители, излегува дека вложила пола милијарда евра повеќе од Русија.
– Рака на срце, руските инвестиции не се за занемарување, но треба да се земе во предвид и колку другите земји придонеле, односно колку вложиле во Србија, без да се тапкаат во гради дека се голем пријател. Италија и Германија во Србија оставиле околу милијарда евра, а речиси толку инвестирале и Грција, додека Австрија најмногу – 2,6 милијарди евра, анализира „Телеграф“.
При неодамнешната посета на Белград, во која Путин беше пречекан со сите церемонијални почести, Путин сепак на Србите им донесе 7 договори како и ветување дека неговата земја ќе го увезува српски „Фиат“.
Кои земји најмногу инвестирале во Србија последните 10 години? Прва на листата е Австрија со 2.6 милијарди евра а останатите се: Германија – 1.2 милијарди евра, Италија – 1 милијарда, Грција – 950 милиони евра, Словенија – 900 милиони, па потоа Русија со 650 милиони и Црна Гора 450 милиони евра.
Не треба да се заборави дека Русија до сега ветуваше многу за Србија…помеѓу ветувањата кои ги наведува „Телеграф“:
Изградбата на Јужен тек која неколкупати веќе се одложува и е неизвесна;
ЈТ во Србија ќе го гради руска фирма, а произведувач ќе биде Србија;
Руски кредит од 800 милиони долари за железничка инфраструктура – условите за договорот прикажани во јавноста после три години од потпишувањето. Каматата за кредитот 4.1 отсто, отплатниот рок на 10 години, а грејс период на 4 години;
– Важно е да се напомене дека до сега прилично Србија ја плати соработката со Русија, а братската љубов повеќе пати не удри по џеб, а од наплатата на Гаспром до денес изгубивме 240 милиони евра, до 2023 може да загубиме и цели 640 милиони евра, се вели меѓу другото во анализата.
Според компарацијата која ја прави српскиот медиум, до септември 2014 година, Србија извезила во Русија нешто помалку од 500 милиони евра, додека пак увезиле околу 1.15 милијарди. Српскиот извоз во Русија и рускиот увоз во Србија значително се разликуваат.
Сепак и покрај ваквите податоци, српскиот претседател Томислав Николиќ неодамна потенцираше дека неговата земја на Русија гледа како еден од најголемите пријатели и партнери.