Голем број прилепчани синоќа доживеале непријатно изненадување, откако забележале дека на регистарските таблици на нивните автомобили биле поставени лепенки со симболот на ВМРО-Народна партија.
Од ОК на ВМРО-НП од Прилеп демантираат било каква поврзаност со ова дело. Според нив, кој и да го направил тоа, имал за цел да предизвика револт на граѓаните на Прилеп кон ВМРО-НП. Во партијата на Љубчо Георгиевски сметаат дека се работи за нов смислен атак врз нив, откако вчера полициски службеници спречиле партиски активисти при лепењето на изборен пропаганден материјал.
„Лицата кои порано беа втор, трет и четврт ешалон во СДСМ, го окупирале ДПМНЕ и денес водат политичка борба со довчерашните сопартијци од СДСМ, ЛДП и други опозициски партии. Браќа и сестри, вистински патриоти, нели ви е доста? Денес во вашето ВМРО е урнато сѐ што би потсетило на нас и на вас. Таму вистинскиот вмровец сѐ уште страда. Таму се прогонува и се протерува сѐ што е ВМРО и, полека но сигурно, нивните места ги заземаат поранешни членови на Демократска алтернатива и пребегани членови од СДСМ“, рекоа од ОК на ВМРО-Народна партија од Прилеп.
Истовремено тие упатија апел до, како што рекоа, вистинските вмровци и чесни патриоти, да се вратат во старото јато, таму каде што немало притисоци и закани, и заедно да ја вратат Македонија на правиот пат.