Последниот извештај од серијата Индекс на рационалност кој го изработува Центарот за граѓански комуникации покажа дека институциите набавувале исти производи со различни цени, а од начинот на кој се спроведувале набавките не можело да се објасни зошто некои институции набавувале поскапо.
Анализирани се набавките на клупи, работни одела, тонери и работни чевли, како и услугите за дезинфекција и дератизација. Најголема разлика во цените е забележана кај набавките на работни одела.
Јавното претпријатие Камена река – М.Каменица ги купило најефтините одела по цена од 1.263 денари по парче, а најскапите одела ги платиле од ЈП Проаква Струга кои чинеле 4.956 денари по парче што претставува речиси 300 проценти повисока цена од најниската.
Работните чевли, кожни високи, се купувале по цена од 870 до 2596 денари со што највисоката цена платена за обувките е за 198% повисока од најниската. Ако Комуналец од Прилеп ги купиле најевтините обувки, Град Скопје ги набавил најскапите без да спроведе е-аукција, забележуваат од Центарот за граѓански комуникации.
Жителите на општина Македонска каменица, пак, седат на најскапите клупи. Нивната служба ги набавила клупите по цена од 12.188 денари, додека најевтините чинеле 4.838 и ги набавила општина Ѓорче Петров.
Општина Велес не одговорила колку чинат клупите кои тие ги поставувале, додека општина Илинден одбила да одговори под изговор дека јавната набавка со пари на граѓаните е деловна тајна.
Во подготовката на овој извештај од Центарот за граѓански комуникации забележуваат дека многу од институциите не одговориле на поставените барања за цените по кои набавувале и не го испочитувале Законот за слободен пристап до информации.