Интензивните врнежи од снег и замрзнат дожд во делови од Европа предизвикаа проблеми во воздушниот, автомобилскиот и железничкиот сообраќај во Франција, Велика Британија и Германија.
Загинаа седум луѓе во судари на автопатите во Франција во текот на викендот.Таму снежната покривка е над 30 сантиметри.
Поради снегот на аеродромите во Париз – „Шарл де Гол” и „Орли” откажани се 40 отсто летови. Други аеродроми во Франција се целосно затворени за сообраќај.
Метрото во Париз и понатаму работи, но откажани се голем број автобуски линии. Доцнат или се откажани голем број тргнувања на брзите возови TGV.
За денеска на аеродромот „Хитроу” во Лондон откажани се 260 летови.
Другите два помали аеродроми во британската престолнина, работат со намален интензитет.
Во текот на вчерашниот ден на аеродромите во Лондон беа откажани 180 летови, а многу пристигнуваа со задоцнување.
Сообраќајот од франкфуртскиот аеродром вчера целосно беше прекинат околу 3,5 часа поради замрзнат дожд кој окова писти, а откажани беа стотина летови.
Авиони кои требаше да слетаат во Франкфурт беа пренасочувани на други аеродроми.
Сообраќајот според германски медиуми подоцна е повторно воспоставен, но со намален интензитет.