Судија може да посетува спортски натпревари, под еднакви услови како и за секој друг граѓанин или член на спортски здруженија и асоцијации, но не треба да создава услови за компромитирање на независноста, непристрасноста и угледот на судскиот систем.
Ова е мислењето на Советодавно тело за судиска етика при Здружението на судиите кое неделава одржало седница, а се очекува да даде и пошироко образложение, откако неодамна Судскиот совет најави дека за случајот „Палермо“ ќе се изјасни советот за етика по реакциите за судијата и претседателот на судот во Кавадарци Лазар Нанев кој заедно со обвинителката Фатиме Фетаи и министерот за правда Никола Тупанчевски присуствуваа на фудбалските натпревари на македонската репрезентација во Палермо и Порто. Судскиот совет исто така најави дека координаторот за Основниот суд во Кавадарци ќе стапи во контакт со судијата Нанев во врска со неговото патување на фудбалските натпревари, но досега таков контакт не е направен и не е земена изјава од судијата.
Советодавно тело за судиска етика, пак, понатаму објаснува дека судијата, како и секој друг граѓанин, има право на здружување што вклучува и право да членува во спортски здруженија и асоцијации, но при остварување на овие права, секогаш треба да се однесува на начин со кој треба да се зачува и да не се прекршува принципот на интегритет и судир на интереси во вршењето на судиската функција.
Ако следењето спортски натпревари, судијата, односно судијата – поротник го остварува под поповолни услови од условите како и за секој друг граѓанин или член на спортски здруженија и асоцијации, со користење на одредени погодности како што е обезбедување „бесплатен билет„ и друго, таквото прифаќање преставува повреда на основните и општите принципи (интегритет и судир на интереси), предвидени во Кодексот за етика на судии/судии поротници, само во случај:
– ако е поврзано во вршењето на судската функција,
– создава перцепција на несоодветно влијание;
– предизвикува креирање реципроцитет, односно чувство на обврска кај примателот на погодноста да возврати на одреден начин на давателот на погодноста;
– влијае на создавање на култура на општо прифатливо однесување;
– создава услови за компромитирање на независноста, непристрасноста и угледот на судскиот систем, се вели во мислењето на Здружението на судии.