Во пресрет на изјавата на министерот за труд и социјална политика која ја разбранува јавноста, на официјалните сајтови на македонските министерства може да се види колку време чекале најмладите министри од сегашната владејачка структура, за своето прво вработување.
Така на пример, министерот за транспорт и врски Миле Јанакиески веднаш по дипломирањето успеал да најде работа, покажува неговата официјална биографија и тоа директно во кабинетот на Министерот за финансии.
Министерката за внатрешни работи, Гордана Јанкулоска, штом дипломирала, веднаш успеала да најде работа по струка како правник во приватен сектор, за по неколку месеци да биде назначена за државен советник во Министерството за финансии, на позиција шеф на Кабинетот на министерот.
Министер за здравство Никола Тодоров, најдолго чекал на своето прво вработување помеѓу најмладите министри. Пред да почне да ја извршува сегашната функција, тој работеше и како министер за образование, а претходно беше поставен и за прв човек на скопскиот катастар. Во неговата биографија се споменуваат и високи позиции во ЈП Водовод и канализација, потоа во АД ГТЦ-Скопје, а една година работи и како заменик-директор на ЈП за стопанисување со станбен и деловен простор.
Министерот за образование пак, Панче Кралев работел уште пред да го заврши својот факултет. Прво почнува со работа во инвестицискиот фонд SEAF во Скопје, а потоа по пауза од две години, време во кое ја завршува својата магистратура, станува асистент за истражување и тутор на студентите на „Сити колеџ“ во Солун.
Спиро Ристовски, пак, министерот кој ја разбранува јавноста со својата изјава дека има работа, но младите премногу бираат што да работат, има најсиромашна биографија меѓу министрите. Тој нема магистратура, а според наведеното на официјалниот сајт нема положено ниту правосуден испит. Сепак, веднаш по дипломирањето, откако поработел една година како правник во приватен сектор, поставен е за заменик-директор на Агенцијата за супервизија на капитално финансирано пензиско осигурување-МАПАС. Во август 2008 станува заменик-министер, за во 2011 да биде назначен за министер за труд и социјална политика во Владата на Република Македонија.
Иако последните податоци на невладините организации покажуваат дека повеќе од 50% од младите во Македонија се невработени, а секој од нив чека по најмалку една година за прво вработување, дел од нив не влегуваат во овој просек.