Колоната демонстранти од седиштето на Специјалното обвинителство се префрли пред Собранието, каде се забележува големо присуство на полиција. Пристапот до улицата на коај се наоѓа Собранието сепак не е блокиран, како што тоа беше случај на претходните протести.
Демонстрантите постојано скандираат ”No pasaran”, а еден од присутните на разглас порача дека протестите нема да стивнат без разлика дали ќе има преговори меѓу политичките партии или не.
Тие со свирежи изразија незадоволство поминувајќи и покрај Министерството за правда и Народната канцеларија на Иванов на рекорд – објекти, кои беа демолирани минатата недела
Помеѓу демонстрантите освен невладините организации присутни се и студентите, како и граѓани кои одговориле на протест, а Триумфалната копија и понатаму е во боите од протестот во сабота.
На протестите кои веќе втора недела се одржуваат во Скопје по одлуката на Иванов за колективна аболиција, се бара итно повлекување на одлуката за аболиција на сите оние против кои се води истрага и против кои е покренато обвинение од страна на Специјалното јавно обвинителство (СЈО); Итна и неотповиклива оставка на Ѓорѓе Иванов од функцијата Претседател на Република Македонија; Произнесување на Уставниот суд за уставноста на СЈО; Формирање на специјално одделение на Кривичниот суд, кој ќе биде надлежен за случаите под јурисдикција на СЈО; Итно повлекување на одлуката за одржување на парламентарни избори на 5 јуни; Задолжително вклучување и присуство на независни претставници на граѓанското општество во процесот на решавање на кризата, како и формирање на преодна влада која докрај ќе ги имплементира итните реформски приоритети од извештајот на Прибе.
Протести за денеска се најавени и во Штип, Кочани и во Битола. Протестот во Штип започна во 18 часот, пред Основниот суд, а во Битола на плоштадот Магнолија.