Денеска започна со работа Комисијата, формирана од градоначалникот на општина Центар Андреј Жерновски која треба да испита дали се почитувани процедурите при поставувањето на скулптурите на Мостот на цивилизациите.
Комисијата ќе го разгледува планот за јавни набавки, договорите и затоа е побаран увид во комплетната документација.
Треба да се утврди како од 29-те избрани конкурсни трудови од страна на Комисијата на општина Центар во месец април 2010, во моментов на мостот се поставени 38 скулптури.
Од избраните 29 скулптури, 5 скулптури се уште ги нема на мостот.
Како што соопштува Општина Центар недостасуваат скулптурите на Доротеј, Михаил и Ефтихиј, Васарион Дебарски, Анреја и Георгиј Кратовски.
Меѓу оние кои ги нема на списокот на конкурсната комисија се и скулптурите на Пердика I, Архелај I, Парменион, ФилипV, Гаврил Радомир, митскиот крај Каран, Иван Владислав, Аминта III, Александар I Филхелен.
Исто така и најново поставената скулптура на Цар Душан не е меѓу избраните дела од Конкурсната комисија на општина Центар во 2010 година.