ЈП Комунална хигиена-Скопје алармира на организирано, намерно расфрлање на отпад во центарот на градот, во доцните ноќни часови.
По добиена видео снимка од анонимен пријавител, на која се гледа, како две лица, намерно расфрлаат отпад, реагираа од ЈП Комунална хигиена-Скопје. Директорот Зухди Енуз вели оти на видео снимката може да се забележат поединци како намерно ги уништуваат садовите за одлагање на отпадот и со црни кеси истураат отпад по должина на шеталиштето во центарот на градот.
„Мораме да истакнеме дека ваквото недолично однесување и уништување на јавниот имот го имаме забележано на неколку локации низ градот, увидено е дека јавни површини што нашите екипи ги имаат исчистено веќе следниот ден се полни со нов отпад, што укажува на фактот дека расфрлањето на отпадот на тие локации се врши намерно во вечерните часови. Имаме информации дека станува збор за организирана група на поединци забележани неколку пати низ центарот на градот, како вршат расфрлање на отпад на различни локации. Но, поради фактот дека на самата видео-снимка е невозможно да се препознаат лицата коишто го вршат ова казниво дело, ја информираме јавноста и апелираме до граѓаните да ни пријавуваат секаков вид на недолично однесување на поединци што претставува непочитување на трудот на комуналните служби на Градот Скопје и нашите заложби за почиста и поздрава животна средина“, рече Енуз и додаде дека секое недолично однесување и загадување на животната средина ќе биде пријавено до надлежните органи и ригорозно санкционирано.