По скандалот кој го откри НОВА за намерата на јавното претпријатие Комунална хигиена да направи размена на деловни простории со фирмата Унитајарс Стил Импекс, денеска со прес конференција се огласи раководството на градското претпријатие.
Главен збор имаше директорот Ракип Дочи, а беше опкружен со ресорни директори, претседателката на Управниот одбор и претставници од синдикатот. Требаше да се стекне впечаток на единство. Просториите во коишто течеше конференција во најатрактивниот дел на Скопје, улицата Македонија во центарот, се дел од размената помеѓу ЈП Комунална хигиена и оваа приватна компанија. Доколку Советот на град Скопје ја изгласа оваа зделка, во нив ќе се всели сопственикот на Унијатарс, Славе Распашковски.
Директорот на новинарите им се обрати со зборовите „голема чест ми е да најавам еден голем проект на Комунална хигиена со кој после 110 години трајно ќе се реши просторниот проблем на претпријатието“.
ЈП Комунална хигиена поседува простории, и тоа на многу атрактивни локации во центарот на Скопје. Но, според директорот, оваа размена била „одлична зделка и финансиски оправдана“.
За размената на деловен простор имало оглас во весник, а на него се јавил единствено Славе Распашковски со неговата фирма Унитајарс.
Според договорот, Комунална хигиена на Распашковски му дава деловни простории во центарот на Скопје, а тој за возврат им ја отстапува поранешната зграда на Санос, во кругот на фабриката ФАС 11 октомври.
Според извори на НОВА, огласот бил стокмен за да го добие токму фирмата на Распашковски. Главен критериум бил деловниот простор да биде во близина на базата за возила на Комунална хигиена. А таа се наоѓа во кругот на ФАС 11 октомври, на земјиште кое е сопственост на Распашковски и за што јавното претпријатие му плаќа кирија секој месец.
На прашањата на НОВАТВ за базата и киријата, директорот Ракип Дочи прво велеше дека не може да се сети кому му плаќаат кирија. Потоа, со асистенција од колегите, се присети.
„Сега не можам точно да ви кажам, некаде над 10.000 евра.“
Но, на инсистирање на НОВА, потоа одговори.
„На истата фирма (Унитајарс) и плаќаме 12.000 евра месечно.“, рече Дочи
Според оваа математика, Распашковски за 4 години досега добил вкупно 576.000 евра за кирија, и ќе продолжи да добива, затоа што Комунална хигиена и натаму ќе му биде кираџија и ќе ги чува возилата на имотот на газдата на Унитајарс. Бизнисменот Распашковски освен парите од кирија ќе добие и 3.377.000 евра од Комунална хигиена, како разлика меѓу проценетата вредност на неговата фирма и имотот на јавното претпријатие.
„Разликата ќе се плати на 24 еднакви рати, без камата и без да се задолжи јавното претпријатие. Со тоа што капиталот на Комунална хигиена ќе се зголеми за 5 милиони евра“, изјави директорот Дочи.
На прашањето дали Комунална хигиена има и други деловни простории во Скопје, директорот рече дека имаат и во други општини. Но, решиле да ги дадат токму најатрактивните, затоа што како рече „само за нив се направила проценка од Бирото за судски вештачења“. Оправдувањето на претпријатието за оваа зделка е дека ним им биле потребни „простории на едно централно место, а досега биле со служби на повеќе локации“.