Трета радост за МЗТ Скопје во АБА 2 за оваа сезона. На отворање на третата рунда во првенството, „металците“, како домаќини, ја совладаа екипата на Рогашка со 74:54 и барем на 24 часа ќе бидат осамени на врвот на табелата со 6 бода.
Клучен фактор за победникот во мечот во СЦ „Јане Сандански“ беше одбраната. Гостите од Словенија ја добија првата четвртина со пола кош разлика (19:20) по што МЗТ Скопје ја презеде контролата и уште во вториот период (15:5) го трасира патот до нов триумф.
На плус деветте поени од првото полувреме, домашните додадоа уште осум во третата четвртина (25:17) за рутински да ја одбработат и последната (15:12) за нова демонстрација на амбициите за највисок пласман во сезоната и враќање во јадранската кошаркарска елита.
Дамјан Стојановски со 18 коша го предводеше составот на Ѓорѓи Кочов во кој двоцифрени беа уште Бојан Крстевски (13) и Кениецот Нуни Омот (11). Српскиот интернационалец Ѓорѓе Лелиќ со 12 поена беше најефикасен во тимот на Рогашка.
Екипата на МЗТ Скопје ќе игра пред своја публика и во четвртото коло (23 октомври) во дербито со Борац Чачак.