Косово не попушта. Ниту еден камион од Македонија не може да влезе на косовскиот пазар. Редица камиони од вчера наутро залудно чекаат на границата со Косово поради забраната која е воведена за ограничен увоз на производи од Македонија.
Како што известуваат косовските власти оваа строга мерка се должи на условениот увоз на брашно која ја воведе Македонија.
На официјалната веб страна на косовското Министерство за трговија стои дека одлучиле да го замрзнат увозот на македонските производи поради блокадата за увоз на брашно која ја воведе Македонија. Забраната стапи на сила од вчера и се однесува на увоз на: жито, брашно, скроб, млеко и млечни производи, производи од зеленчук и овошје, оцет, вино и други алкохолни пијалоци, тутун и производи од тутун.
-Ова е трета година по ред Владата на Македонија да прави блокада на увозот на брашно и пченица од Косово, кое е спротивно на договорот на ЦЕФТА. И покрај договорот одлуката на биде укината на 2 –ри септември, мерката за забрана на брашното сеуште важи и покрај ветувањата дадени претходно. Косовската влада неможе да дозволи таква блока и затоа ја воведува оваа мерка која стапува на сила од 5-ти септември се вели во образложениетео на Министертвото за трговија на Србија.
Министерството за трговија е посветено на заштита на локалните производители и ќе дејствува активно за да ги заштити од неправедната забрана за извоз на косовските призводи. Одлуката ќе важи до укинувањето на забраната за увоз на брашно се вели известувањето на Министерството.
Стопанската комора и компаниите предупредуваат дека доколку проблемот не се реши брзо, Македонија може неповратно да го изгуби косовскиот пазар бидејќи периодот на ембарго може да го искористат Србија, БИХ или Хрватска.
Уплашени се и превозниците поради загубите од застојот на камионите. Здружението на авто-превозници веќе ги известиле своите членови дека транспортот за Косово е запрен, а камионите кои транзитираат да го заобиколуваат Косово.
-Известени се сите членови на нашата асоцијација, на границата веројатно се наоѓаат камиони кои не биле запознати со новонастанатата ситуација со Косово изјави за НОВА Биљана Муратовска генерален секретар на Макам-Транс.
Откако НОВА вчера прва ја објави веста Владата со став се огласи дури денеска. Премиерот Груевски изјави дека преку разговори се обидуваат да ги нормализираат односите со Косово и доколку во тоа не успеат можни се сите опции.
– Мерката која претходно Владата на Македонија ја воведе за брашното не е насочена кон една држава туку кон сите земји членки на ЦЕФТА и е во согласност со регулативата на ЦЕФТА. Мерката пак преземена од Косово еднострано е насочена кон Македонија. Во текот на денешниот ден се обидуваме преку разговори да ги нормализираме работите.Доколку во тоа не успееме можни се сите опции. Не станува збор за мерка само кон Косово туку кон сите земји членки на ЦЕФТА и ниту една друга земја членка не реагира на ваков начин како што реагира Косово и без претходна најава,“ изјави Груевски.
Реагираат и од Здружението на производителите на вино. Тие велат дека во првата половина на оваа година бил забележан пораст на извозот на вино во шишиња во однос на истиот период лани, со одлична продажба и двојно повисока цена по литар на флаширано вино.
-Ембаргото кое го воведе Косово секако дека ќе има негативни последици по овој позитивен тренд, но ние искрено се надеваме дека преку дијалог на надлежните министерства оваа ситуација ќе биде многу бргу надмината, со што ќе бидат отстранети сите пречки во меѓусебната трговија велат од Здружението на винариите.
Стопанствениците потенцираат дека косовскиот пазар иако мал, е многу значаен за македонската економија. Само минатата година на Косово биле извезени 56 401 литри вино со вкупна заработка од повеќе од половина милион евра. Но, најголема заработка Македонија има од земјоделските производи, зеленчукот, овошјето, оризот, млечните и пекарските производи. Само од ориз во државата лани се слеале повеќе од 2,2 милиони евра, а од пекарски производи 5,6 милиони евра.