Косовската влада бара да заврши мисијата на Еулекс. Набљудувачите пак се сомневаат дека институциите на Косово ќе можат сами да се борат против корупцијата и криминалот и да се занимаваат со истрага на воени злосторства јавува Дојче Веле.
Портпаролот на Еулекс Блерим Красниќи вели дека е јасно оти мисијата еден ден ќе го напушти Косово.
-Но, ние не сакаме да оставиме зад себе слаби институции, кои ќе бидат и натаму под влијание на политиката и нема да можат да се борат против корупцијата и организираниот криминал, нагласува Красниќи.
Во текот на изминатите години на Косово често имаше критика на сметка на работата на мисијата на ЕУ за недоволна ефикасност, расфрлање со пари и наводна едностраност кон одредени ентитети. Србија го обвинува Еулекс за поддршка на стремежите за независност на Косово, но со работењето на Еулекс се незадоволни и институциите на Косово.
Косовскиот парламент на крајот на јули донесе резолуција и ја задолжи владата да подготви план за завршување на мисијата на Еулекс. Повод беше апсењето на петмина команданти на ОВК, од страна на Еулекс во мај годинава. Уапсените се обвинети за воени злосторства во текот на косовската војна. Меѓу уапсените се и Сулејман Селими, поранешен командант на ОВК и се‘ уште официјален амбасадор на Косово во Албанија, како и Сами Луштаку, градоначалник на градот Скендерај (Србица), на северот на Косово, и политички сојузник на косовскиот премиер Хашим Тачи.