Поранешниот директор на Фондот за иновации и технолошки развој Коста Петров, против кого има анонимна пријава во Државната комисија за спречување на корупцијата во изјава за Нова вели дека ниту склучил договор со издавачката куќа „Три“ додека беше прв човек во Фондот, ниту било кога додека ја извршувал својата функција донел одлука за финасиска поддршка на проект од оваа издавачка куќа.
Според пријавата што била доставена до антикорупционерите наводно станува збор за конфликт на интереси затоа што на издавачката куќа „Три“ и биле одобрени пари за проект, а дека токму оваа фирма ги издавала и книгите на Петров, како што беше и првото негово печатено дело „Се гледаме на врвот“ кое пред околу три години стана и една од најпродаваните книга од македонски автор во земјава.
– Како прво не сум запознаен дека од страна на Државната комисија за спречување корупција е отворен предмет за било какво мое постапување. Во време на вршење на мојата функција како директор на Фондот за иновации и технолошки развој не сум донел одлука за финансирање на проект ниту сум склучил договор за доделување на финансиски средства со издавачката куќа „Три“, тврди Петров.
Тој појаснува дека такво нешто и не можело да се случи ако се земе предвид дека носењето одлука за доделување на финансиски средства за финансирање на проекти, воопшто не е во надлежност на директорот.
Петров се повикува на Законот за иновациска дејност според кој доделувањето финансиски средства за финансирање на проекти е во надлежност на Комитетот за одобрување на инвестиции.
Петров објаснува дека Комитетот за одобрување на инвестиции се состои од пет члена кои ги избира Владата, од редот на реномирани меѓународни експерти.
– Комитетот ги разгледува и одобрува предлог-проектите доставени до нив, по што донесува одлука за финансирање на доставените проекти. Сето погоре наведено може да се верификува со проверка на целокупната документација која е достапна во Фондот за иновации и технолошки развој. Останувам и понатаму отворен за соработка со надлежните институции, ни изјави Петров.
Во Државната комисија за спречување на корупцијата ни потврдија дека стасала пријава против Петров, отвориле предмет, а дека во текот на истрагата ќе го повикаат Петров да даде изјава за случајот и да приложи документација. Наводно, според анонимната пријава, Фондот за иновации и технолошки развој кофинасирал 5.936.000 денари за проект на издавачката куќа „Три“ со вкупна вредност од 7.249.159 денари, од кои 2.174.747 биле сопствено кофинасисрање.
С.М.