– Со ваквиот судски аршин – за пренесена изјава од релевантен извор, човек кој оваа власт го назначи за државен секретар во МНР, а потоа и амбасадор во Чешка, да бидеме казнети со околу 9.000 евра – можеме комотно да ставиме катанец на Фокус. Или, можеби и тоа им е целта, вели за НОВА уредничката на Фокус, Јадранка Костова, откако Основниот суд Скопје 2 одлучи „Фокус“да му плати 9.000 евра отштета на Сашо Мијалков.
>>„Фокус“ треба да му плати 9.000 евра отштета на Сашо Мијалков
Десната рака на Костова, заменик-главниот уредник Владо Апостолов предупредува на фаталните завршници на критичките новинари во Македонија:
– Добивме голема казна поради пренесени изјави на ексамбасадор, но од друга страна мислам дека поминавме сосема добро. Во земја каде новинари завршуваат во затвор или загинуваат во сообраќајки под многу чудни околности, ние треба да сме пресреќни само со парична казна.
Целата македонска јавност треба да се запраша зошто нема ни трага ни глас од ексамбасадорот во Прага, Игор Илиевски откако ги даде изјавите за „Фокус“.
Исто така, апелирам колегите новинари да ги следат процесите во кои за клевета и за навреда тужени се функционерите од Владата, како оној кога Граѓани за европска Македонија го тужат Зоран Ставрески и со тоа убаво да ги видат двојните аршини на нашето судство, изјави Апостолов за НОВА.
Пресудата поточно ја донесе Јованка Спировска-Панева, а според неа, Јадранка Костова е казнета со 5.000 евра, а новинарот Владо Апостолов со 1.000 евра. Дополнително, уредникот и новинарот треба да ги надоместат и судските трошоци на адвокатот на Мијалков, Антонио Апостолски, во вредност од 3.312 евра.
Во судскиот процес во кој обвинет беше и поранешниот амбасадор на Македонија во Чешка, Игор Илиевски, тој на Мијалков, треба да му плати 10.000 евра.
Првиот човек на УБК не се појави на ниту едно рочиште, а не достави ни психијатриско вештачење за претрпените душевни болки.