Јас сум човек кој е подготвен да се соочи со предизвици и подготвен да преземе одговорност, истакна во интервју за Канал 5 телевизија, премиерот Димитар Ковачевски и претседател на СДСМ во одговор на прашање околу неговите мотиви да ги преземе фунцкиите претседател на СДСМ и претседател на Владата.
Говорејќи за својата богата кариера и искуство, лидерот на СДСМ обелодени и колку време планира да биде на премиерската позиција на Македонија.
– Мислам 12 години да бидам премиер. Човек треба да биде амбициозен кога работи, истакна кусо Ковачевски.
Во врска со барањата на ВМРО ДПМНЕ за избори тој рече дека се неосновани и повтори кога планира да има парламентарни избори во државата.
– Преземавме одговорност за решавање на предизвиците кои се пред граѓаните, имаме пандемија, енергетска криза. Нашиот договор за формирање на оваа Влада е „Влада 2022- 2024“, и јас и во самото експозе кажав дека избори ќе има, да, 2024 година кога ќе имаме претседателски избори и ќе имаме парламентарни избори, рече Ковачевски.
Тој нагласи дека нуди соработка и ги повикува опозицијата, академијата, стопанските комори, синдикатите, „заедно да сработиме во услови на криза за да имаме помали последици во стапанството, вратата е отворена за сите кои сакаат да помогнат“.
– Имаме здравствена криза, имаме енергетска криза, имаме економска криза и да барате избори во таква ситуација е целосно неполезно. Затоа што и немате ново што да понудите, туку само повторувате секој ден дека треба избори. Вратата е отворена за сите кои сакаат да помогнат. Нема да прифатам уцени за што да разговараме ако се сретнеме. Ќе контактирам со Мицкоски, ќе му се јавам, јас кажав под уцени нема да раговараме, но јас како премиер морам да разговарам со сите, но сега фокусот е на енергетската криза и на сето она што ни се случува во државата. И тоа се надевам ќе го прифати како аргумент и ќе разговараме, рече Ковачевски.
Тој додаде дека неговото појавување во политиката не е отсега.
– Јас сум бил член на Извршниот одбор во време кога кога претседател бил Бранко Црвенковски и бев член на ИО кога претседател беше Заев, во меѓувреме сум бил член на изборни штабови, а сум бил и дел од работните тела на СДСМ во комсијата за финансии, во комисијата за економија. Koга станав претседател, предложив нов Изборен одбор, нови потпретседатели и секретари во партијата, а при изборот на министри во Владата, се се водев по принципот да се изберат лица со квалитети и знаења за извршување на функциите кои им се доверени“ посочи Ковачевски.
Претседателот Ковачевски истакна дека изборот на кадровски решенија не треба да се гледа во контекст на за некакво помирување во СДСМ затоа што во партијата не постои никаков конфликт, додавајќи дека има добра соработка со сите претходни претседатели на СДСМ.