Премиерот Ковачевски, денеска, заедно со министерот за економија, Крешник Бектеши и директорот на Државниот пазарен инспекторат, Горан Трајковски беше во посета на еден од маркетите во Скопје.
Посетата, како што соопшти владината прес-служба, е со цел да ја провери снабденоста и цените на основните прехранбени продукти, меѓу кои јајцата од кокошка и оризот, за кои што Владата донесе одлука за замрзнување на цените, како и да ја провери снабденоста и цената на брашното.
„Драго ми е што денеска се уверив дека нашите одлуки се почитуваат, што, се надевам е случај и во другите маркети. Ваквата мерка ќе остане во важност до крајот на април 2023 година, со тенденција вакви слични мерки да донесеме и за други прехранбени производи, ако за тоа се укаже потреба“, рече Ковачевски.
Тој вели и дека „пријатно се изненадил“ кога видел дека и цената на брашното е намалена во дел од маркетите, без при тоа, државата да донесе одлука за тоа.
„Ваквиот потег го поздравуваме и ги охрабруваме и другите продажни места да го следат овој пример“, изјави шефот на Владата.
„Сакам да ја уверам македонската јавност дека нашето присуство овде не е случајно. Владата, и јас како прв човек во Владата, водиме практична, инклузивна политика. Носиме одлуки кои ги засегаат граѓаните и затоа, сакаме лично, на терен, да го слушнеме гласот на граѓанинот, гласот на народот, како реакција на политиките кои ги спроведуваме и одлуките кои ги носиме“, рече Ковачевски.
„Сакам да ја уверам македонската јавност дека нашето присуство овде не е случајно. Владата, и јас како прв човек во Владата, водиме практична, инклузивна политика. Носиме одлуки кои ги засегаат граѓаните и затоа, сакаме лично, на терен, да го слушнеме гласот на граѓанинот, гласот на народот, како реакција на политиките кои ги спроведуваме и одлуките кои ги носиме“, рече Ковачевски.
Тој притоа најави можно намалување и на цените на овошјето и зеленчукот.
Министерот Бектеши најави можности и за други ценовни интервенции.
„Најверојатно утре, на владина седница, ќе се донесе одлука за замрзнување на цените на хигиенските производи, а во текот на оваа недела ќе бидат замрзнати и цените на дел од овошјето и зеленчукот“, рече тој.
Директорот на Државниот пазарен инспекторат, Горан Трајковски изјави дека сите инспектори се на терен и дека кај дел од правните субјекти се констатирани прекршоци, за што се водат постапки. Тој апелираше до трговците да ги намалат цените и на другите производи, доколку се во можност.
„Инспекторите се на терен и постапуваме со својот полн капацитет. Изминатите 5 дена, извршени се над 500 надзори, од кои 130 по одлуките на Владата за што се издадени прекршочни платни налози во вредност од над 750.000 денари“, рече Трајковски.