„Неформалниот состанок на Европскиот совет е организиран, како што веќе најави и Шарл Мишел заради многу важни теми. Тоа е војната во Украина, второ, обезбедување на што поголема енергетска независност од Русија и трето е иднината на ЕУ во смер кон проширувањето и на интерната динамика на подготовка на ЕУ за пријавување на нови членки, бидејќи не е исто функционирање со 27 членки виз-а-ви функционирање со 30-32 земји членки, меѓутоа процесот е поддржан од сите земји членки како никогаш досега“ рече премиерот Димитар Ковачевски во Дневникот на Сител.
Тој додаде дека ЕУ знае дека им е потребно проширување, што впрочем е и заеднички именител на сите глобални организации во моментов.
„Погледнете го НАТО, две земји кои не сакаа да станат земји членки на НАТО, едни од најбогатите земји во Европа, Шведска и Финска, сега самите во светло на новиот геополитички момент сакаат да станат земји членки. Финска веќе стана, Шведска е во процес на ратификација“ рече Ковачевски.
Премиерот додаде дека во момнетов Европа се обединува и тоа е еден од клучните процеси, а за тоа дали ние ќе бидеме дел од него зависи од одлучноста и визијата на политичарите во нашиот Парламент.