Премиерите Ковачевски и Петков телефонски разговарале за два инциденти кои деновиве се случија во Северна Македонија.
Премиерот Димитар Ковачевски денеска информираше дека вчера му се јавил бугарскиот колега Кирил Петков и му побарал информации за два инциденти кои се случија во Скопје и во Битола.
Станува збор за инцидентот на гробот на Гоце Делчев каде беа искинати ленти на венците оставени од бугарските делегации како и за искршените стакла во клубот на Бугарите „Ванчо Михајлов“ во Битола.
„За искинатите венци на гробот на Гоце Делчев го информирав Петков дека МВР врши истражни работи, а за искршеното стакло во клубот во Битола му реков дека не е политички инцидент туку инцидент мотивиран од приватни причини“, рече премиерот Ковачевски.
Запрашан за текот на преговорите со Република Бугарија, Ковачевски посочи дека претставници на Министерствата за надворешни работи на двете земји, на 10 и 11 февруари ќе имаат средба на која ќе се разговара за отворените политички прашања.
„Доколку се постигне напредок, прифатлив за двете страни врз основа на европски вредности и почитување на двете страни, како на државите, така и на граѓаните, тогаш МНР тоа ќе го соопшти на ист начин како што министерот за надворешни работи имаше обраќање во Комисија за надворешни работи, од неколку часа, каде ги образлагаше основните поставки на разговорите што се водат“, изјави премиерот Ковачевски, по посетата на компанијата „Текстил Солушн“, одговарајќи на новинарско прашање дали има нови моменти во однос на политичките средби со Бугарија.