Во понеделник во Брисел ќе се сретнат грчкиот министер за надворешни работи Никос Коѕиас и Метју Нимиц, медијаторот на Обединетите Нации за спорот со името. Средбата ќе се одржи на маргините на Советот на шефовите на европските дипломатии.
Нимиц беше во Скопје пред една недела и се сретна со шефот на македонската дипломатија Никола Димитров. Но од Скопје не замина за Атина на средба со тамошните власти како што тоа досега беше пракса.
Вчера од Солун грчкиот премиер Алексис Ципрас, по средбата со бугарскиот колега Бојко Борисов и српскиот премиер Александар Вучиќ, ја најави оваа средба:
“Најлошото што може да се служи за сите нас е да имаме константно дестабилизирана земја на Балканот. Затоа, од првиот момент презедовме иницијативи за стабилност и градење на доверба (…) министерот за надворешни работи ќе има контакти со Метју Нимиц додека министрите на двете земји имаат интензивни разговори”, подвлече грчкиот премиер.
Во вторник, 18 јули, во Брисел се одржува Советот за стабилизација и асоцијација помеѓу ЕУ и Македонија. Средбата ќе ја водат шефицата на ЕУ дипломатијата Федерика Могерини, до неа ќе биде комесарот за проширување Јоханес Хан а македонската делегација ќе ја води Димитров.
Министерот Димитров во понеделник пристигнува во Брисел но засега нема најави за можна средба со грчкиот колега Коѕиас. Двајцата министри се сретнаа во Атина на 14 јуни.