Министерот за надворешни работи на Грција Никос Коѕиас денеска пристигнува во еднодневна официјална посета на Македонија.
Тој во Скопје ќе има средби со неговиот домаќин, шефот на македонската дипломатија Никола Димитров, со претседателот Ѓорге Иванов, премиерот Зоран Заев, со вицепремиерот за европски прашања Бујар Османи и со претставници на парламентарните партии.
Според најавите од двете страни, нема да разговара за спорот за името.
Посетата на Коѕиас е возвратна, по таа на Димитров на Атина во јуни годинава. Во фокусот на разговорите, според најавите, ќе биде имплементацијата и проширувањето на мерките за градење доверба и најновите случувања во регионот. Се очекува Димитров, како и при посетата на Атина, да побара поддршка за градење добрососедски односи и деблокирање на процесите за интеграција на Македонија во НАТО и ЕУ.
Отворањето на тие патишта, според Димитров, може да придонесе да се затвори и главното прашање меѓу Скопје и Атина.
Медиумите во Атина деновиве пишуваа дека грчката Влада ќе се обиде да ги спушти очекувањата од посетата на Коѕиас и да ја искористи за да покаже дека новата Влада на Заев нема волја за решавање на спорот, бидејќи е во првите 100 дена од формирањето и во октомври земјата ја очекуваат локални избори.
Министерот Димитров вчера рече дека е важно да се воспостави отворена релација и Грција да го препознае новиот момент во Македонија и да го поддржи.
– Довербата е првиот чекор кон пријателство и тоа е многу важна работа. Целта е да се прошират мерките за градење доверба во повеќе области и да се направат пореални и да се имплементираат. Второ, повлековме една сериозна линија на корективни мерки согласно времената спогодба. Ова Министерство и Влада ги земаат сериозно преземените обврски, го земаат сериозно Уставот на Македонија и ќе бидеме многу принципиелни и цврсти во контекст на излетот што ни се случи во Канада. Тоа само ќе ни ги зајакне позициите и во однос на утрешната средба и генерално во однос на Грција, изјави Димитров.
Завчера во Атина беше одржан состанок за мерките за градење доверба меѓу Македонија и Грција во согласност со договорот постигнат меѓу министрите за надворешни работи на двете земји во Скопје на 24 јуни 2015 година.
Состанокот, како што информира МНР, е продолжение на пријателскиот и конструктивен дијалог на заемно договорените теми, како што се проекти за меѓусебно поврзување во областите на транспортот и енергијата, потоа полициска соработка, европски програми, култура, образование, цивилна заштита, јавна администрација, здравствена заштита, соработка меѓу дипломатските академии и иницијативи за деловна соработка. Следниот состанок ќе се одржи во Скопје.