На фотографиите што ги испрати Хелсиншкиот комитет за човекови права можете да видите како изгледаат тоалетите и мијалниците во Прифатниот центар за странци во Гази Баба каде мигрантите-бегалци, во крајно нечовечки услови, поминуваат по неколку месеци на нивниот пат по подобар живот.
Оваа организација за одбрана на човековите права реагира на трагичниот настан кој се случи во Македонија со загинувањето на 14 бегалци на нивниот пат по подобар живот и вели дека државата не ги заштитува ниту основните права на овие луѓе кои на патот кон Европа минуваат низ нашата земја.
Според Хелсиншкиот комитет во последните 6 месеци усмртени беа најмалку 27 странци, вклучително бебиња, деца и жени: «Кога полицијата ќе ги открие овие лица тие најчесто се притвораат во Прифатниот центар за странци во населбата Гази Баба каде во крајно нечовечки услови поминуваат по неколку месеци».
.jpg)
Освен тоа, во Македонија «пругите се необезбедени, не постои никаква сигнализација или знаци што би укажале на опасност за движење на луѓе, а на мигрантите и бегалците не им се обезбедува ниту најосновната хуманитарна помош. Единствениот Прифатен центар во Гази Баба е пренатрупан и во распаѓање, нема соодветна здравствена заштита, а не се обезбедува ниту правна помош. Мигрантите и бегалците живеат во неизвесност за нивната иднина, а Прифатниот центар е целосно затворен за здруженијата на граѓани и медиумите», вели оваа организација која веќе одамна бара дозвола да го посети овој Прифатен центар за да ја извести јавноста за условите во кои живеат овие луѓе.
Според Хелсиншкиот комитет «обидот за релативизација на оваа хуманитарна криза од страна на МВР преку изнаоѓање оправдувања во неефективната гранична контрола на Република Грција и претставувањето на овој проблем како глобален во никој случај не ја ослободува Република Македонија од сопствените обврски».
Соопштението потсетува дека Македонија е потписник на Европската конвенција за човекови права преку која превзела обврска да ги заштити животите на лицата кои се наоѓаат на нејзина територија. И македонскиот Устав вели дека странците уживаат слободи и права гарантирани со Уставот, под услови утврдени со закон и меѓународни договори.
Хелсиншкиот комитет потсетува дека во 1999 државата обезбеди прибежиште за над 350.000 бегалци од Косово, а денес не може да се справи со неколку стотини странци во истата ситуација.