Најновата верзија на ракетата на „Спејс Икс“ експлодираше во вселената неколку минути откако беше лансирана од Тексас.
Поради опасност од расфрлани парчиња од ракетата во атмосферата, повеќе авиони мораа да отстапат од своите редовни рути.
Според првичните информации, осум минути по лансирањето, контролниот центар на мисијата на „SpaceX“ изгубил контакт со ракетата „Starship“ висока 123 метри и која носела 10 тест сателити.
„Starship“ достигнала височина од 146 километри и брзина од 21.316 километри на час.
Извршниот директор на компанијата, Илон Маск, на платформата X објасни дека прелиминарните анализи укажуваат на истекување на гориво што предизвикало зголемување на притисокот над ѕидот на моторот. „Успехот е неизвесен, но забавата е загарантирана“, напиша Илон Маск на платформата X.
„Starship“ е најмоќната ракета на светот, а ова беше нејзин седми тест, истакнува американската агенција. НАСА планира да користи „Starship“ за слетување на астронаутите на Месечината до крајот на деценијата.
Во меѓувреме, вселенското летало „Blue Origin“, производ на компанијата на извршниот директор на Amazon, Џеф Безос, вчера беше успешно лансирано од Флорида со новата ракета на компанијата на Безос „Њу Глен“.