Кредит во вредност од 305 милиони евра и одобри Европската банка за обнова и развој (ЕБОР) на Македонија за подобрување на патната и железничката инфраструктура.
Од нив 145 милиони евра се планирани за изградба на втората фаза од железничката пруга кон Бугарија од Бељаковце до Крива Паланка и 160 милиони евра за Програмата за национални патишта.
Кредитот е со рок на отплата 15 години со грејс период од 4 години и каматна стапка која во моментов изнесува 1,15 отсто (6 – месечен ЕУРИБОР плус 1 отсто).
За подготовка на втората фаза од железничката пруга, Македонија ќе добие и грант во износ од 5.700.000 евра за изработка на основниот проект и покривање на дел од трошоците за надзор на градежните работи.
Дополнително, ЕБОР ќе обезбеди грант од 670.000 евра за консултантска помош за имплементација на проектот.
За Делницата 3 од Коридорот 8 од Крива Паланка – граница со Бугарија средствата ќе се обезбедат по завршување на сите подготвителни активности за оваа делница. Финансирањето ќе се обезбеди со грант од ИПА 2014-2020 и заем од меѓународни финансиски институции.