Штипската полиција поднесе 12 кривични пријави под сомнение дека сториле „спречување на службено лице во вршење на службена должност“ и “напад на службено лице при вршење работи на безбедноста“.
Според соопштението на МВР на 28 минатиот месец, околу 15.50 часот, пријавените заедно со група на граѓани се собрале во непосредна близина на влезот на СВР – Штип со намера насилно да влезат во просториите на СВР Штип и да спречат обавување на информативен разговор со три лица, на кои претходно им е издадена покана за водење службен разговор.
Билјана Казанџиска, пратеничка од СДСМ и кандидатот за градоначалник исто од СДСМ, Здравко Коцев следени од останатите пријавени и група на граѓани се упатиле кон влезот на кругот на СВР Штип, тие физички ги спречиле полициските службеници во вршењето на службено дејствие и продолжиле кон самиот влез на зградат на СВР – Штип.
Во соопштението од МВР се вели дека и по ангажирањето на дополнителен број на полициски службеници, формиран е кордон, дел од пријавените со употреба на физичка сила и туркање со раце ги нападнале полициските службеници.
Извикувале “убијци, убијци“, “полициска, партиска држава“, “диктатори“, “ајде да се тепаме…“ и сл.
Погледнете го видео записот од 28 февруари. Тогаш НОВА објави дека група поддржувачи на отпорот се судри со штипската полиција, откако членови и симпатизери на СДСМ биле повикани на информативен разговор во полициската станица поради инциденти на собирот на опозициските поддржувачи од утрината пред зградата на Фондот за здравствено и пензиско осигурување во Штип.
СДСМ: Полициска хајка во Штип
Реакција од опозиционата СДСМ, според кои овие пријави не се ништо друго освен политичка одлука и директна нарачка на политичкото раководство на ВМРО-ДПМНЕ, кое уште еднаш го злоупотребува Министерството за внатрешни работи за партиски цели во предизборна кампања.
„На истиот начин како што Груевски, преку Јанкуловска, нареди насилно отстранување на новинарите и пратениците на 24-ти декември, сега се обидува да изврши притисок врз опозицијата и да ги заплаши граѓаните.
– Проценката на режимот и овој пат е многу погрешна. Власта драматично греши ако мисли дека некого ќе уплаши. На овој начин само дополнително го зголемуваат револтот кај граѓаните и решителноста на опозицијата да ја порази оваа ненародна власт, се вели во реакцијата од СДСМ.