Претседателката на Сенатот на Шпанија, Марија Пилар Куенка, денеска на средбата со премиерот Зоран Заев во Мадрид му порача дека „преку договорот од Преспа и преку севкупната ваша домашна и меѓународна политика вие сте пример за моќта и важноста на дијалогот и кога е во прашање водење успешен дијалог. Можеме да учиме од вас“. Според неа, овие остварувања биле резултат и на лидерството на земјата во последните четири години.
Заев, кој е во посета на Мадрид заедно со вицепремиерот за европски прашања, Никола Димитров, претходно ја изрази благодарноста на Владата и на македонските граѓани за поддршката што Шпанија ја пружа постојано на евроатланскиот пат на нашата земја и особено сега во процесот за пристапување во членство во ЕУ.
„Граѓаните на Северна Македонија се особено благодарни и вечно ќе го паметат гестот што го направи шпанскиот Сенат кога овозможи електронско гласање на Протоколот за ратификација на членството на Северна Македонија во НАТО, и тоа во исклучително драматични моменти на почетокот на пандемијата“, истакна Заев, како што соопштува владината прес-служба. Тој гест бил охрабрување за силната посветеност на земјата за негување и афирмација на европските вредностите и на реформи според европските стандарди, особено во сферата на владеењето на правото и борбата против корупцијата.
Куенка рече членовите на Сенатот ја препознале важноста на пристапувањето на Северна Македонија во членството во НАТО и затоа со задоволство ги презеле сите пандемиски мерки за да обезбедат електронско гласање за да го затворат процесот на ратификација по што следуваше и формалниот прием на земјата за членка во Алијансата.
Заев и делегацијата ја посетија историската библиотека на Сенатот каде што се изложени географски карти на Европа од 17 век на кои е презентиран поширокиот географски регион Македонија.