Романот „Куќа на сеќавањата и заборавот“ на познатиот белградски писател Филип Давид, само месец и пол откако ја доби престижната награда на неделникот НИН за роман на годината, се појави на македонски јазик.
Издавач на овој роман е „Везилка 2011“ а преводот на македонски јазик го направи писателот Ристо Лазаров, кој е автор и на поговорната белешка.
Романот веќе се преведува и ќе биде објавен во сите екс-југословенски центри, а најавен е и превод на повеќе од десетина јазици во светот.
Во Белград романот предизвика огромен интерес и доживеа извонреден успех и четири изданија во вкупен тираж од над 50.000 примероци.
„Куќа на сеќавањата и заборавот“ говори за трагичната судбина на Евреите и мрачните времиња на Холокаустот, концентрационите логори, нацизмот и фашизмот, низ потресните приказни кои, маестрално компонирани, затвораат еден круг на злото. Романот е, всушност, литературно сведоштво за мрачните времиња и злото.
Како што забележува во поговорот Лазаров, романот конечно го ситуира Филип Давид таму каде што му е местото, меѓу добитниците на престижната награда на НИН, веднаш до неговите најдобри другари и браќа по перо – Данило Киш, Борислав Пекиќ и Мирко Ковач.
Сo тоа уверливо се потврди постоењето на големата четворка во екс-југословенска литература: Киш, Ковач, Пекиќ и Давид.