– Пред точно 11 години ние решивме да го сториме тоа што сметавме дека е единствено исправно во дадените околности. Бевме сосема свесни за ризиците, а на награди и признанија, ниту помисливме, ниту ни беа битни. Но денес сме горди, што токму ние сме добитници на највисокото признание за остварувања во областа на промоцијата, заштитата и унапредувањето на човековите права. Горди, што се низ што поминавме не беше залудно и што со нашите активности помогнавме да се случат повеќе позитивни промени во општеството. Сигурни сме дека во нашата татковина никогаш повеќе нема да се повтори масовно прекршување на правата на илјадници граѓани. Оваа награда сакаме да ја посветиме на нашите семејства и на сите луѓе, кои со храброст, труд, стручност и посветеност, искрено се борат за остварување и заштита на човековите права, се борат за правда и владеење на правото, рече Ѓорѓи Лазаревски, еден од свиркачите и добитник на овогодинешната државна награда која е воопшто и прва награда „Мето Јовановски“.
– Дозволете ми да се заблагодарам на членовите на Одборот за честа што ни ја укажаа да бидеме првите добитници на државната награда „Мето Јовановски“. Исто така сакам да му се заблагодарам и на почитуваниот новинар Синиша Станковиќ кој ја поднесе иницијативата мене и на Костовски да ни биде доделена оваа награда, изјави Лазаревски.
Лазаревски и Костовски своевремено вработени во Управата за безбедност и контраразузнавање ги извадија „бомбите“ и му ги предадоа на ексдиректорот на УБК Зоран Верушевски.
Двајцата беа уапсени во февруари 2015 година, како обвинети во случајот „Пуч“, веднаш откако тогашниот лидер на опозицијата Зоран Заев почна да ги пушта јавно „бомбите“.
Костовски се спогоди со Обвинителството и призна дека е виновен по што беше осуден на три години затвор. Лазаревски не призна вина и поради тоа остана 11 месеци во притвор. Костовски беше пуштен од затвор во април 2016 година, по аболицијата на поранешниот претседател Ѓорге Иванов.
Од нелегално прислушуваните материјали, поранешното СЈО отвори предмет „Таргет-Тврдина“ во кој беше посочено дека директно и индиректно со прислушувањето биле опфатени околу 20 000 граѓани. Предметот заврши со пресуда во која обвинетите, меѓу кои беа и поранешниот директор на УБК Сашо Мијалков и поранешната министерка за внатрешни работи Гордана Јанкуловска, беа прогласени за виновни.