Ѓорѓи Лазаревски и Звонко Костовски, вработените во УБК кои го открија скандалот со прислушувањето во Македонија, ќе ја добијат годишната „Наградата за слобода на говорот“ на на Коалицијата за заштита на свиркачите во Југоисточна Европа и Европскиот центар за заштита на правата на свиркачите.
Наградата ќе им биде врачена задутре во Приштина.
Како што се наведува во образложението, како колеги во Управата за безбедност и контраразузнавање, Лазаревски и Костовски три години работеле со цел да го документираат нелегалното прислушување на над 20.000 бизнисмени, активисти, новинари и други политички неистомисленици на минатата власт. Објавувањето на дел од прислушуваните разговори во 2015 година резултираше со нови избори во 2016 и формирање нова влада во 2017 година. Покрај тоа, разговорите беа докази за обвиненија на 94 лица и седум компании.
Поради тоа што посочи на нелегалното прислушување, Ѓорѓи Лазаревски помина 11 месеци во затвор. Денес тој е слободен и иако ретко се појавува во јавноста, на 23 март ќе направи исклучок за да ја прими „Наградата за слобода на говорот“ во свое и во име на неговиот колега Костовски.
Во август лани, во интервју за НОВА, Лазаревски или како што доби прекар “невидливиот херој“, за првпат отворено говореше за причините поради кои се одлучиле да разобличат еден режим, што резултираше со објавување на „бомбите“, но и за личното чувство во тие години додека собирале докази за аферата.
-Во тој период се создаде амбиент на приватизација на институцијата. Во еден момент јас бев во очај и мислев дека ова никогаш веќе нема да се сруши…За среќа преживеавме, но јас не можам да се повратам, едноставно не сум веќе истиот човек…Веројатно за еден живот вреди да се помине тоа, да си речеш „барем не сум живеел залудно“, вели најпознатиот македонски свиркач Ѓорѓи Лазаревски.