Ексразузнавачот Ѓорѓи Лазаревски, кој беше свиркачот кој ја откри аферата со масовното незаконско прислушување од страна на УБК во претходната власт смета дека оваа Влада не го смета Законот за укажувачи како приоритет.
Тој на денешната трибина „Две години од неприменувањето на Законот за укажувачите“, во организација на НВО Инфоцентар, говореше за тоа како го спеовеле целиот тој процес заедно со Ѕвонко Костовски.
– Во 2010 година, кога со колегата Ѕвонко Костовски решивме да станеме укажувачи, немавме институција на која да и се обратиме, затоа што немаше закон за укажувачи. Баравме личност и се одлучивме тоа да биде екс директорот за безбедност и контрараузнавање. На тој човек му ги предадовме материјалите, но и нашите судбини и судбините на нашите семејства, а можеби и судбината на нашата држава. Ние се грижевме материјалите да бидат квалитетени и да може да послужат за судска разрешница, рече Лазаревски.
Лазаревски кој и натаму е без работа и за него засега не се отворени вратите да се врати назад на старото работно место, вели дека никогаш не се сретнал со Зоран Заев, односно одлуката нему да му се предадат бомбите била на поранешниот директор на ДБК, Зоран Верушевски.
Случајот прво бил пријавен и во МВР откако виделе како нивниот соработник е уапсен заедно со целото семејство.
– Бев 12 часа во МВР, по што добив притвор. Во МВР кажав дека обвинувањето на нашиот колега за шпионажа е неправилно и дека е обезбедено од Петтата управа од незаконско следење на материјали. Тоа наше пријавување и спогобата што ја направи Ѕвонко Костовски, а која според мене беше мудра, доби меѓународна поддршка. Тоа беше нотирано и во Извештајот на Прибе. Звонко е јунакот на Македонија кој ги обезбеди бомбите. Алтернативата беше да се обвини СДСМ за злосторничко здружување. Имаше обвинение кон фиктивен странски фактор. Обвинителот Златко Биковски се израдува кога му реков дека ќе ја прифатам спогодбата. Дури облече и тога. Кога отидовме кај судијата на претходна постапка реков дека не ја прифаќам спогодбата зашто обвинителот ме тера да прифатам туѓо кривично дело, рече Лазаревски.
За тоа како „бомбите“ дојдоа до јавноста, тој вели дека неговото УСБ со копии од прислушуваните разговори ги дал и на јавен обвинител, а бидејќи од МВР и обвинителството немало соодветен одговор, потоа било одлучено бомбите јавно да се обелоденат и е стапено во контакт со Зоран Заев.
Она што за јавноста во најголем дел е непознато, како тие документи биле изнесувани од МВР во време кога претходната власт имала строга контрола, посебно врз овие служби.
Лазаревски вели дека само мал дел од прислушуваните разговори, можеби 2 или 3 проценти, се изнесени од УБК
–Можеби не се тоа два проценти, можеби се 0,2 проценти, или 10 проценти од нелегалните прислушувања, но ги имаше многу. Особено е чудно што пет години се прислушувала министерката за внатрешни работи Гордана Јанкулоска. Инаку министерот за финансии Зоран Ставрески не е прислушуван, рече Лазаревски.
-Ги вадевме материјалите внимателно. Копии правев јас. Ги подававме на УСБ во ходник на разминување. Бевме безбедни зашто никој не се посомнева во нас. Во УБК имаше луѓе кои знаеја за прислушувањето, правеа транскрипти, а не пријавија. Уште во 2008 година дознав дека се прислушува, но тогаш оганот беше помал. Не смее УБК да биде надзорот на прислушувањето, тоа треба да биде ОТА, објасни Лазаревски, кој работел како инженер во МВР.