Градоначалникот на општина Центар Андреј Жерновски и Даница Павловска од иницијативата „Го сакам ГТЦ“, денеска го осудија обидот, за како што велат, на ВМРО- ДПМНЕ да го саботира референдумот за ГТЦ.
Во текот на вчерашниот ден, соопшти Жерновски, голем број граѓани на Центар пријавиле дека биле посетувани од активисти кои лажно се претставувале дека се членови на невладино здружение на архитекти и ги лажеле граѓаните дека референдумот во недела е откажан, дека е невалиден или нелегитимен.
Лажните активисти според пријавите на граѓаните не биле од Скопје, туку биле носени од други градови.
Павловска денеска потенцираше дека единствена легитимна организација на архитекти во Македонија е Асоцијацијата на архитекти.
– Се работи за срамна злоупотреба на овие луѓе за политички цели и спречување на легитимното право на граѓаните на Центар да излезат на референдум и да одлучат каков ГТЦ сакаат, оној во барок и стиропор или ГТЦ со автентичниот изглед, реконструиран и разубавен, рече Павловска.
Според Жерновски пак, ВМРО ДПМНЕ не ја научиле лекцијата со Пустец, а до граѓаните апелираше да не наседнуваат на манипулации.
– ВМРО- ДПМНЕ не ја научи лекцијата со Пустец. Сака со иста стратегија на лажење на центарци да го саботира референдумот за ГТЦ. Оваа нивна стратегија е лоша. Апелирам до сите граѓани на Центар да не подлегнуваат на вакви провокации и манипулации и масовно да излезат на референдумот во недела. Особено им порачувам на сите активисти и членови на ВМРО- ДПМНЕ од Центар да излезат и да гласаат за себе и за ГТЦ. Посебни притисоци има кон оние што работат во јавната администрација и затоа им порачувам да дојдат во недела бидеќи на ГТЦ му треба нивната поддршка, рече Жерновски.