Рекордниот број на болни и немоќни кои гласале од дома на денот на локалните избори ги загрижува набљудувачите, но не предизвика никаква реакција кај политичките партии.
Никој не истражи како е возможно од дома да гласаат 13 323, особено што МОСТ предупредува на растечкиот тренд на вакви случаи.
-Непропорционалниот сооднос на бројот на гласачи со бројот на пријавени болни и немоќни е само уште еден показател на тоа, велат во МОСТ.
Во оваа граѓанската асоцијација укажуваат дека во Теарце имало поднесено 49 барања за предвремено гласање од дома, но откако Општинската изборна комисија најавила дека ќе врши проверки дали лицата ги сполнуваат условите за ваков вид на гласање, сите барања биле повлечени.
Во струмичко Ново Село од дома гласеле повеќе од 5 проценти од населението, во Крушево и Демир Хисар 4, 3 проценти, а слична е ситуацијата и во Берово, Пехчево, Босилово, Демира Капија, Пласница. Во Градско од 3127 гласачи, 105 биле болни инеподвижни, па гласале од дома. Во Велес 46 261 дури 679 не биле во можност да излезат да гласаат на изборните места.
Според законските уредби под болно и немоќно лице се подразбира лице кое неможе да ги врши основните животни потреби, кое е неподвижно, потполно слепо, заболено од дистрофија или сродни мускулни или нервно мускулни заболувања, церебрална или детска парализа, како и параплегија.
Експерти за НОВА објаснуваат дека за да се има некоја од овие дијагнози лицето неможе да се движи во станот ниту со соодветни помагала, неможе да одржува лична хигиена, да се облекува, да зема храна, ниту да ги извршува основните животни потреби.
НОВА поседува документи од лекар во Велес кој на еден човек му издал уверение дека боледува од ваква тешка болест. Утредента, ден по изборите човекот е виден и фотографиран како без проблем се шета по улица. Документите, името на лекарот и адресата на човекот ги има редакцијата на НОВА.
Од МОСТ велат дека токму драстично големиот број на болни кои гласале од дома ја доведува во прашање тајноста на гласот на овие лица. Дополнително, прашање е дали ваков документ може да издаде матичен лекар. Од таму апелираат до надлежните институции да ги истражат ваквите случаи и да ја информираат јавноста за причините поради кои овие граѓани не се наоѓаат во Избирачкиот список.