ЛДП ќе иницира закон со кој ќе се регулира употребата на канабисот во рекреативни и медицински цели.
Таа појава постои и не можеме ние да го игнорираме, туку треба да се регулира, кажа Јулијана Николова пратеничка од ЛДП. Таа додаде дека имале консултации со здружението „Билка“ дали да се предложи декриминализација или легализација и очекуваат многу скоро овој предлог закон да се најде во Собрание.
-Сите истражувања покажуваат дека секаде каде што се користи, се намалува употребата на тешки дроги. Со регулирање на продажбата и купувањето нема да има улични препродавачи и нема да има криминални дејствија, туку ќе се стави ред, а ќе се заштитат и малолетниците, рече Николова.
Во однос на аудио снимката што беше обајевна на социјалните мрежи, а на која се слуша гласот на пратеникот Павле Богоевски, Николова кажа дека очекува „институциите да се занимаваат со тоа, затоа што се работи за напад на достинството на поединец“.
-Во 2015 се работеше за цела политичка гарнитура која работеше против интересите на државата и има разлика. Дали пратениот треба да понесе одговорност, не можам да зборувам во негово име, ќе си каже самиот, кажа Николовска.
По објавената снимка и ДУИ најави иницијатива за таканаречен „ветинг“, односно контрола за секој пратеник или функционер којшто врши јавна дејност како што се судии и обвинители за контрола во врска со користење на наркотици, но и учество во криминал и корупција.
-Ние оваа иницијатива ја почнуваме од нашите редови во ДУИ и сакаме да ја предложиме на Собранието, а очекуваме и поддршка од граѓанскиот сектор и медиумите. Секој кој што врши јавна функција треба да подлежи на овој тест и ние очекуваме поддршка од сите кои се искрени, рече Груби.
Тој не сакаше да одговори дали Павле Богоевски треба да ја напушти функцијата пратеник, но напомена дека за ДУИ е неприфатлив терминот „метла“.
Пратеничката група од ВМРО ДПМНЕ, пак, пстави метла пред Собранието, со која му порачаа на Заев „да почне да мете од Павле Богоевски“.
-Богоевски призна дека нелегално купувал наркотични супстанци и го прекршил законот. Богоевски треба да одговори од каде вршел набавка, дали ја препродавал дрогата и колку време е корисник на нарко-супстанци. Доколку е чист, уште вчера требаше да направи тест за дроги. Ги повикуваме надлежните институции и ОЈО да покрене постапка и да го затвори случајот, а Заев веднаш да се фати за метлата. Ако нема, еве ние му оставаме една пред Собрание, рече Дафина Стојановска од ВМРО ДПМНЕ.
Снимката беше објавена на профил со пседвоним Илија Громовник. По ова пратеникот Богоевски во полициската станица Центар, се пријави самиот себеси, но и непознат сторител. Во одделот за борба со недозволена трговија и шверц се пријави сам себе, бидејќи авторот на постот на руската социјална мрежа ВК тврди дека пратеникот по телефон нарачувал да купи кокаин. Богоевски тврди дека не купувал кокаин туку канабис масло за близок човек, а во полиција пријави и дека бил нелегално снимен од таксист кого не го памти.
Богоевски вели дека се што ќе побара полицијата во истрагата тој ќе направи, дури ако треба и тестирање. Според него постот на ВК и разговорот е снимен пред неколку месеци, но се пушта сега кога тој како претседател на комисијата за мандатно имунитетни прашања треба да закаже расправа за одземање на мандатот на Никола Груевски, поради 6-месечното отсуство по бегството од Македонија.