Три дена од нападот на малолетник во центарот на Скопје и на ЛГБТИ Центарот, МВР нема официјално соопштение за настанот.
Ние најостро ги осудуваме насилното дивеење на мала група на млади луѓе во центарот на Скопје, кога беше претепан и малолетник кој минал во близина на споменикот „Воин на коњ“, а беа повредени и гости во Центарот за заштита на правата на ЛГБТИ заедницата во старата Скопска чаршија, велат од Либерално-демократската партија.
– ЛДП со загриженост констатира дека во Македонија се повеќе се зголемува говорот на омраза кон сите оние кои размислуваат слободоумно и различно од матрицата која ја наметнува влаеачката партија.
– Зачестените вербални напади врз малцинските заедници, особено на маргилизираните малцински заедници, имаат тенденција на трансформација од вербален конфликт во отворен линч и физички напад кој станува секојдневие во нашата држава. Шокирани сме од недостатокот на општествена одговорност и државничка заштита на уставниот поредок од Владата и Претседателот на Република Македонија.
– Како и при дивеењето пред општина Центар, така и во овој случај, Владата и Претседателот остануваат неми и на тој начин индиректно и премолчено даваат поддршка на насилството, додаваат од партијата.
ЛДП ги повикува Премиерот и Претседателот на Република Македонија итно да ги осудат повиците на насилство и самиот напад на маргинализираните заеднци. ЛДП ги потсетува Премиерот и Претседателот на државата дека се имаат заколнато пред Уставот на Република Македонија дека ќе ги почитуваат и промовираат Уставот и законите, кои ги дефинираат граѓаните како еднакви, ги гарантираат нивните човекови права и ги штитат граѓаните од секава форма на дискриминација. Премиерот и Претседателот се должни да бидат лидери на нацијата и да го почитуваат а не да го погазуваат Уставот на Република Македонија.