Лекарската фела се подели- на една страна младите лекари, а на друга институциите. Откако Асоцијација на млади лекари и специјализанти(АСМЛ) најавија протест за среда во 11 часот, против насилството врз лекарите, утринава се одржа дебата на која не беа поканети ниту младите лекари како организатори на протестот, ниту новинарите.
На трибината присуствуваа претставници на Лекарската, Фармацевтската и Стоматолошката комора, министерот за здравство Венко Филипче, Рената Десковска, министерка за правда и Оливер Спасовки, министер за внатрешни работи. Од АСМЛ сметаат дека ова е начин да се минимизира протестот против насилството врз лекарите.
„Два дена пред протестот против насилството врз лекарите се правата вакви ад-хог средби во организација на ЛКМ на која се поканети по нивна произволна оценка учесници на таа дебата. Очигледно се работи за политичка агенда, на дебата на која присуствуваа министерот за здравство, МВР и правда, а АСМЛ и Синдикат не се поканети“, изјави за НОВА, Ненад Лазаров претседател на АСМЛ.
На дебатата во деканатот на Медицински факултет која не траеше повеќе од еден час, претставници од АСМЛ влегоа непоканети, при што Ненад Лазаров на крајот истапи и се вмеша во дискусијата изразувајќи револт бидејќи не се повикани.
„Фасцинантно е како на една ваква средба каде што се присутни сите, не се викнати младите лекари кои што во среда организираат протест. Неколку пати баравме да бидеме примени во ЛК, како сакате да решаваме проблеми, каква е таа инклузивност, ве молам да ми одговорите, “, рече Лазаров, кој непоканет влезе на дебатата.
Министерот за здравство Ванко Филипче, одговорноста за тоа што не биле повикани младите лекари и новинарите ја префрли на Лекарската комора, за која рече деке е организитор на дебатата. Тој за НОВА тврди дека не станува збор за минимизирање и дека тој во среда ќе го поддржи протестот на лекарите против насилството.
„Состанокот беше организиран од Лекарската комора, така да во однос на поканите и кого се повикале треба да се обратите таму. Апсолутно, ќе го поддржам протестот во среда и сметам дека овие немили настани се можност за подигнување на јавната свест, како и да преземеме низа мерки, но и мерки од други институции кои ќе не поддржат“, изјави за НОВА, Венко Филипче, министер за здравство.
Овие случувања, најавата за протест, дебатата која беше организирана без претходна најава, како и многу коментари на социјалните, следат по неколку напади врз здравствените работници. Според министерката за правда Рената Десковска, напад врз здравствен работник е исто како и напад врз полицаец и за тоа е предвидена казна затвор во траење од една до 10 години.