Лекарската комора на Македонија најостро реагира и ги осудува се почестите вербални и физички напади на докторите на нивните работни места и укажува дека неодамнешните инциденти во Клиничата болница Тетово и Штип, се само дел од насилството над докторите кои ја вршат својата професија одговорно, стручно и етички, се вели во реакцијата од Лекарската комора.
Во изминатите неколку месеци во Лекарската комора биле доставени повеќе дописи од доктори во кои тие известуваат дека при укажување на здравствена заштита на своите работни места се почесто се напаѓани како вербално, така и физички од страна на пациентите или нивните најблиски роднини.
– Комората уште еднаш укажува дека со насилството над докторите на медицина им се нанесува голема штета и на самите пациенти, а како професионална асоцијација, апелираме до здравствените власти и директорите на здравствените установи да преземат дополнителни мерки и активности со кои на докторите ќе им се обезбеди соодветна заштита и услови за нормална работа,реагира доктор Џабир Бајрами потпретседател на Лекарската комора.
Од комората потенцираат дека ваквите случаи се многу почести отколку што се зборува за нив, а секој поединечен инцидент не е само лична трагедија и траума, туку го урива интегритетот и дигнитетот на докторот и здравствениот систем во целина.
Во Лекарската комора сметаат дека докторите треба да имаат посебен статус кој треба законски да се регулира, со кој ваквите инциденти нема да се третираат како обични конфликти и напади.
Неопходна е посебна правна рамка со која ќе се обезбеди поголема заштита на докторите и здравствените работници при укажувањето на здравствената заштита велат во комората.
НОВА пред неколку месеци информираше за напад на лекарка специјалист на Клиниката за гастроентерохепатологија, а на вакви напади често се жалат лекарите кои обично работат на ноќните дежурства, особено во ургентните служби.