Ситуацијата во фабриката Дрекслмаер е само уште еден доказ дека во услови на капитализам најчестите жртви на фамозните странски инвестиции се работниците и нивните семејства кои што се оставени на немилост од нашата држава и од нејзините нституции, сметаат Движењето за социјална правда – ЛЕНКА и Левичарското движење – СОЛИДАРНОСТ, утре ќе одржат прес –конференција пред зграда на фабриката.
– Државата денес ги штити интересите на капиталот и на сопствениците, а сe повеќе го угнетува сопствениот народ. Дури и по цена на модерно ропство.
– Вработените во фабриката Дрекслмаер покрај тоа што работат со максимално, полночасовно време, а неретко и повеќе од тоа, примаат минимален надомест за нивниот труд. Вработените во оваа фабрика работат во тешки услови и соочени се со силни психолошки, но и со физички притисоци од раководството на фабриката. Институциите, како по обичај, ги нема. Тие се активираат само кога треба да застанат на страната на работодавачите.
– Работниците во Дрекслмаер работат прекувремено, за време на празници и во тешки услови, а за нивниот труд не добиваат соодветен надомест, толку колку што им следува и колку што впрочем, е загарантирано со закон! Нивниот обид за спротивставување за тешките работни услови преку нивното основно право на штрајк, беше пресретнат од раководството на фабриката со реваншизам, заплашување и со спроведување на низа колективни отпуштања. Но, и со директни закани кон останатите вработени.
– Затоа, остро им порачуваме, како на работодавците така и на Владата на Република Македонија, дека работниците нема да ги оставиме на нивната милост и немилост! На работниците во Дрекслмаер им изразуваме поддршка, која се надеваме, ќе им се влее храброст да не потклекнат на притисоците и да продолжат организирано да го изразат револтот кон управувачката и сопственичка класа на фабриката, се вели во соопштението до јавност испратено од Ленка и Солидарност.