Силниот ветер кој синоќа дуваше во главниот град откорна дел од фасадата на МЕПСО. На социјалните мрежи утрово градоначалникот на Скопје, Петре Шилегов, сподели фотографии со коментар дека проектот „Скопје 2014“ е небезбеден за животот на граѓаните.
„Причина повеќе за оние кои се сомневаа (за жал ги има, од сите политички провиниенции) дали треба да се реши Скопје 2014. Да се разбереме. Скопје 2014 мора да се реши. Сега и веднаш. Најбрутално. На истиот начин на кој што го силуваа нашиот град. Почнуваме после изборите. И да !!! Конечно да (ќе) има одговорност за ова лудило“, порача Шилегов, нагласувајќи дека освен што е криминален, кичерајски, болноумен и слично, проектот Скопје 2014 е и небезбеден за животите на луѓето.
Фасадата на МЕПСО со столбови во антички стил и нов покрив чинеше 11 милиони евра. Изведувач на фасадата беше „Бетон Штип“, а автор на проектот „Неимар инженеринг Скопје“.
Ветерот го откорна и покривот на Средното хемиско училиште „Марија Кири Склодовска“. Шилегов споделувајќи фотографии објави дека кровот на Хемиско е реконструиран во 2009 година, кога министер е Никола Тодоров и тоа од страна на министерството.
„Квалитетот на “реконструкцијата” е видлив на фотографијава. Годинава, ние ја реконструиравме фасадата на училиштето (енергетски ефикасна). Како што гледате, фасадата е во одлична состојба, што богами, за фасадите од Ск 2014 не може да се рече …“, рече Шилегов.