Здруженијата за заштита на правата на маргинализираните заедници, кое е под постојани притисоци и напади во изминатиот период, во обраќањето до МВР бара информации за преземените мерки за насилствата, говорот на омраза, уништување на имот и закани по живот врз активистите на овие здруженија.
Освен информацијата дека беше „каменувана канцеларијата на Хелсиншкиот Комитет“, во билтенот на МВР не се достапни никакви други информации, ниту за други случаи на насилство мотивирано од омраза, ниту за говор на омраза кој поттикнува насилство и сериозни закани по животот на ЛГБТ лицата и нивните поддржувачи, се истакнува во обраќањето.
– Постојат многу докази кои упатуваат на сторителите, камери низ центарот на градот, камери од плоштадот, новинарски снимки и изјави, видео од нападот врз ЛГБТИ центарот за поддршка, сведоштва на полицајци кои директно беа жртви на насилство и беа спречени во извршувањето на нивните надлежности, коментари со закани и повици за насилство на социјалните мрежи.
– Поради ова, бараме најитно полицијата да постапи согласно законските овластувања и да ги идентификува сторителите на кривичните дела, и очекуваме јавно соопштение за текот на истрагата и исходот од истата, се вели во соопштението.
Најпосле, нема никакви информации ниту за последниот случај на каменување на домот на актерот Петар Стојковиќ, кое уследи откако актерот пријави во МВР случаи на закани по неговиот живот.