Стечајците кои протестираат пред Собранието се обидоа да го пробијат полицискиот кордон кој го обезбедува Законодавниот дом.
Додека трае дебатата за Законот за материјално обезбедување на невработени лица со кои би требало да се реши долгогодишниот проблем на околу 6.000 стечајци, надвор протестираат над 100-тина стечајци кои бараат да биде донесен овој закон кој нив ќе им обезбеди основни егзистенцијални услови.
Тие носат пароли „Спасете ги стечајните работници“, „Нож до коска“, а четворица од нив сеуште се во Собранието. Велат останавме без пари, неможеме да одиме на лекар, да си ги платиме комуналиите.
Околу Законодавниот дом распоредено е силно полициско обезбедување.
„Ова е чист геноцид, ова го нема во ниту една држава. Ние сме најмалку виновни, сите што се во Парламентот водат грижа за своите бизниси, а највиновен е Живко Митревски, синдикалниот лидер“ изјави за НОВА, Лилјана Георгиевска.
Таа најави дека ќе протестираат пред домовите на сите пратеници додека не биде решено нивното прашање, и потенцираа дека доколку продолжи вака, овој проблем ќе стане „Украина 2“.
Стечајците најавуваат дека ќе останат пред Собрание и дека повторно ќе постават шатори ако законот не биде донесен.
Тие се жалат дека националната телевизија МРТВ која досега не објавила ништо за нивните протести, бара тие да плаќаат претплата.
Во Собранието по иницијатива на СДСМ се расправа за законот за материјално обезбедување на невработени лица со кои би требало да се реши долгогодишниот проблем на околу 6.000 стечајци. Еве акценти од дебатата Диневски VS Павлова.
Власта не даде поддршка на комисиската расправа, а опозицијата предлага законски акт кој предвидува тие да добиваат месечен паричен надомест од 6000 денари до пензионирање.