Германскиот министер за финансии Кристијан Линднер нема да отпатува за Пекинг откако неговиот кинески колега Лиу Кун, со кој требаше да се сретне утре, ја откажа средбата во последен момент.
Според соопштението на германското Министерство за финансии, Лиу Кун неочекувано ја откажал средбата два дена пред да се одржи, објави Еурактив.
Кинеското Министерство за финансии побара во текот на викендот разговорите меѓу двајцата министри закажани за 10 мај да се одложат од причини поврзани со распоредот“, изјавија тие за германскиот весник „Велт“, додавајќи дека кинеската страна не дала друго објаснување, што поттикна шпекулации за вистинската причина за откажувањето.
И Линднер и неговата партија, либералната ФДП, се смета дека имаат прилично далечни односи со Кина и ги повикаа Германија и Европската унија да бидат внимателни во однос на нивните односи со „системскиот ривал“.
Неодамна, министерката за образование и истражување, Бетина Старк-Ватцингер, исто така од либералната ФДП, била прва членка на германската Влада која го посети Тајван.
Посетата ја поттикна кинеската амбасада во Германија да изрази „значително незадоволство“.
„Дали откажувањето има некаква врска со ставот на ФДП дека Германија треба да биде цврста во однос на Пекинг е работа на шпекулации“, велат за „Велт“ од Министерството за финансии.
Планираната средба меѓу Линднер и Кун требаше да ги подготви двете земји за претстојните владини консултации.
Според германското Министерство, датумот за средбата допрва треба да биде објавен.