Регистрирани се пет нови случаи со дијагноза менинго енцефалитис од Скопје, Кочани, Македонски Брод, Охрид и Гевгелија. На Клиниката за инфективни болести во Скопје кај уште едно лице е лабораториски потврдено присуство на бактеријата листерија, здравствена состојба на едно бебе на Клиниката за детски болести во Скопје се подобрува.
Според Звонко Миленковиќ, претседателот на Комисијата за заразни болести и директор на Инфективната клиника две лица со дијагноза менинго енцефалитис се излекувани и се пуштени на домашно лекување.
„Сомнителни сме сите. Причинителот го има насекаде, меѓутоа болеста може да ја добијат само оние кои се екстремни возрасти, бремени жени и имунокомпромитирани. Дури и внесена во организмот листеријата во вообичаени концентрации не може да даде никакви симптоми“, рече Миленковиќ и додаде дека кај здрави лица со подобар имунитет заболувањето поминува со полесна клиничка слика, со стомачни проблеми, дијареја, температура која трае неколку дена и спонтано поминува.
Раководителот на Секторот за превентивна здравствена заштита при Министерството за здравство Јованка Костовска рече дека во последниов месец се регистрирани седум случаи.
„Листериозата како заболување не е пријавена во Македонија претходните години, а како изолат од храна регистрирана е кај три примероци лани и кај три примероци годинава со тоа што годинава имаме пријавено и заболување“, вели Костовска.
Три лица во Македонија починаа од бактеријата листерија која ја има во храната. Станува збор за лица на возраст од 72 и 59 гдини и едно новороденче.
Листериозата е бактериско заболување, кое најчесто настанува по внесување на храна контаминирана со бактеријата листерија, како што е месо, преработки од месо, непастеризирано млеко и млечни производи, недоволно измиено овошје и зеленчук, димена риба и друго.
Кај здрави лица со подобар имунитет, заболувањето поминува со полесна клиничка слика, со стомачни проблеми, дијареа или симптоми слични на грип. Листеријата се уништува со добра термичка обработка, со печена и варена храна (над 70 степени целзиусови).
Најчесто се регистрира меѓу постари лица со намален имунитет, бремени жени и новородени деца. Кај нив може да предизвика сериозни компликации, како сепса, воспаление на мозочни обвивки (менинго енцефалит), воспаление на срцева обвивка (перикардит), воспаление на зглобови и сл.