“Секој, во својот приватен живот, може да мине низ тешкотии. Тоа е нашиот случај сега”, вака одговори францускиот претседател на новинарското прашање дали Валери Триервајлер е се уште прва дама на Франција. Франсоа Оланд побара разбирање за приватната ситуација во која тој се наоѓа откако пред една недела беше откриена неговата тајна врска со актерката Жули Гаје.
Ова се случи попладнево на годишната традиционална прес конференција на францускиот претседател на која тој долго се осврна на економската ситуација на неговата земја. Но, неговата љубовна афера со атерката не можеше да остане незабележана. На оваа тема Оланд доби само две прашања, прво од новинарот на “Фигаро” кој побара објаснување за љубовната афера.
“Го разбирам вашето прашање. Секој, во својот приватен живот, може да мине низ тешкотии. Тоа е нашиот случај сега. Имам еден принцип а тоа е дека приватните работи се решаваат приватно. Ова не е ни момент ни место за тоа. Нема да одговорам на ниту едно прашање на таа тема. Тоа ќе го сторам кога на закажан термин. А тој термин е состанокот со Барак Обама на 11 февруари во САД”, одговори Оланд.
Според набљудувачите Оланд го чека излегувањето на Триервајлер од болница, каде што тоа останува на неколку дена по шокот што и го предизвика љубовниот скандал. Потоа се очекува дека тие двајцата заедно ќе ја соопштат одлуката за тоа дали ќе продолжат да живеат заедно или новната врска ќе заврши. Од извори блиски на првата дама дознаваме дека таа веќе решила дека ќе му го прости на Оланд неверството. Останува да се види која ќе биде неговата одлука.
Второто прашање на оваа тема сепак дојде и се однесуваше на можната тужба против весникот кој ја објави информацијата. “Мојата индигнација е целосна. Затоа што тоа е нарушување на една фундаментална слобода која може да биде од голема важност за секој од нас. Мораме да го имаме овој принцип за почитување на приватниот живот и личниот дигнитет”, рече Оланд.
Љубовната афера имаше и свои политички и безбедносни елементи. Два француски медиуми објавија информација дека претседателот со својата љубовница се среќавал во стан кој има врска со корзиканската мафија. Освен тоа тој на состаноците одел на скутер па новинарите прашуваа дали безбедноста на претседателот била доведена во прашање.
“Во секој момент и насекаде мојата безбедност е беспрекорна и ефикасна, јавно или приватно. Никој не смее да биде загрижен на таа тема”, вели Оланд.
Најголемиот дел од конференцијата беше посветен на економијата. Оланд смета дека неговата земја мора да продолжи да биде влијателна во светот. Тој најави мерки за намалување на даноците за претпријатијата за да можат тие да произведуваат и да вработуваат. Својот план тој го нарече “пакт за одговорност”.
Европа исто така беше дел од неговиот говор. Оланд предложи повеќе инцијативи за економска и социјална конвергенција помеѓу Франција и Германија, фонд за минимална плата на европско ниво и хармонизација на даночните политики. Тој се заложи и за креирање на голема енергетска франко-германска фирма за енергија.