Француската актерка Жули Гаје, којашто во медиумите е споменувана како љубовница на претседателот Франсоа Оланд, се најде во центарот на јавна полемика откако француската влада ја негираше информацијата за нејзиното именување во жирито на Вила Медичи, којашто оваа угледна јавна установа – Француска академија во Рим ја објави на својата интернет страница.
Според пишувањето на францускиот сатиричен весник Le Canard објави дека 41-годишната актерка Жули Гаје на католички Бадник била именувана за член на жирито на „Вила Медичи”, палатата во којашто е сместена Француската академија во Рим.
Оваа информација во средата наутро беше потврдена и на интернет страницата на оваа реномирана културна установа, којашто покрај Гаје, во жирито се и вајарката Ан-Мари Клере, кореографката и примабалерина Мари-Ање Жијо и композиторката Луси Ронкети.
Ова жири ќе избере петнаесет стипендисти, научници и уметници, кои во септември во Вила Медичи ќе работат 12 до 18 месеци.
Меѓутоа француското министерство за култура, исто така, во средата претпладне објави дека, на крајот, актерката не е именувана”.
„Ја предложи Ерик де Шасе, директор на Француската академија во Рим, но министерството одлучи да не ја именува. Одлуката не е потпишана”, изјавиле за Франс Прес од кабинетот на француската министерка за култура, Орели Филипети.
Минатиот петок францускиот таблоид Closer објави текст со фотографии, коишто наводно ја докажуваат тајната љубовна врска меѓу претседателот и актерката.
Партнерка на Оланд од 2007 година е новинарката Валери Триервејлер, со којашто се во вонбрачна врска и во својство на „прва дама” го придружува на официјалните патувања во странство и манифестации во Франција.
Претседателот Оланд кој во вторникот одржа прес-конференција а како одговор на новинарско прашање за тајната врска со 41-годишната актерка Гаје, изјави:
“Секој, во својот приватен живот, може да мине низ тешкотии. Тоа е нашиот случај сега”, вака одговори францускиот претседател на новинарското прашање дали Валери Триервајлер е се уште прва дама на Франција. Франсоа Оланд побара разбирање за приватната ситуација во која тој се наоѓа откако пред една недела беше откриена неговата тајна врска со актерката Жули Гаје.