Пред вечерашното второ по ред ЛОТО ШОУ со фискални сметки, со коешто власта на Никола Груевски си поигрува со надежта на граѓаните со нивни пари, ќе поставиме неколку прашања на кои Груевски и Ставрески должат одговори на јавноста, согласно Законот за игри на среќа и забавни игри, изјави денеска Хари Локвенец, член на ИО на СДСМ.
-Кој е организаторот на наградната игра премиере Груевски и ЛОТО-вицепремиере Ставрески?
Дали е Лотарија на Македонија којашто го прави шоуто или Владата на Република Македонија којашто е негов нарачател?
Еве зошто.
Ако е Владата, Груевски и економистот Ставрески, според законот, треба да кажат, колку пари ги чинат граѓаните, овие награди што ќе отидат во рацете на неколкумина. По која цена, власта со буџетски пари ги купува наградите за ЛОТО ШОУ-то за фискална дисциплина?
Ако организатор на наградната игра е Лотарија на Македонија, зошто во ниеден весник не се објавени правилата на наградната игра, како што наложува во вакви случаи Законот за игрите на среќа и за забавните игри?
Кој и да е организатор, според истиот овој закон, тој треба да уплати 18 проценти посебна давачка од фондот за награди. Дали ова е испочитувано? УЈП веднаш ќе затропаше на вратата на фирмите што не платиле данок, дури и на оние најмалите, испорачувајки им казни во илјадници евра. Дали кога се работи за Владата на Република Македонија, `се е дозволено, па и прескокнување даноци?
И ова не е се. Освен што со пари на граѓаните се купуваат наградите со кои се само рекламира власта, учесниците во наградната игра отсега ќе плаќаат за 10 денари поскапи поштенски марки. Точно ли е ова? Дека наменски испечатените поштенски марки од 8 денари се повлечени. Дека сега поштенска марка за пликот за наградната игра “Фискална во рака, награда без мака“ чини 18 денари.
Колку пари отидоа за печатење на сега неупотребливите поштенски марки премиере Груевски и вицепремиере Ставрески и во чии џебови? Зошто сега поштенските марки за наградната игра чинат 10 денари повеќе?
Жално е што Груевски и Ставрески, во паника од издржаната мерка на СДСМ за поврат на ДДВ, со што корист ќе имаат сите граѓани, направија карикатура на фискалната дисциплина.
Откако ги турнаа граѓаните во мизерија и сиромаштија, сега преку игри си поигруваат со нивната надеж.
И уште дрско без срам профитираат од тоа!- изјави Локвенец.