Зоран Иванов
Собранието денеска ја пушти низ вода родителската емоција за трагедијата во Кочани.
А можеа пратениците, мнозинските, елегантно и фер да формираат посебни анкетни за секој трагичен настан одделно.
Вака, политиката пак сурово надвисна над жртвите и нивните семејстава.
Народните избраници денеска ги издадоа, ги продадоа чувствата на родителите и на повредените во кочанскиот пожар.
Мнозинство од партиските робови маскирани во народни преставници, не смогнаа чувства за солидарност.
Не пројавија емпатија за болките на мајките, татковците, сестрите и браќата, на сограѓаните и на сожителите на жртвите од кочанскиот пекол на која му кумуваа одговорни во институциите.
Институции чиј сопственик се тие, пратениците.
И со нивно не реагирање на непочитувањето на законите што ги аминувале токму тие, пратениците, и за чие спроведување, надзорот се токму тие.
И по оваа немила собраниска случка денеска, ајде корекција веќе утре.
Конечно сторете нешто заедно, нешто хумано.
Пробајте.
За почеток, еве, по ова ваше денешна морално фијаско со одлуката да не формирате изолирана, да не изгласате автономна анкетна за жртвите од кочанскиот пожар, за вашето дистанцирање и за вашите еквилибристики со родителските чувства, со нивните трајни болки, со вашето политизирање со шеесет и трите жртви и со двестоте повредени, за вашето игнорирање на јасните барања и на уште појасните пораки од родителите, барања нивни, а обврска ваша и тема службена од доменот на вашата политичка обврска но и тема од вашиот институционален атар што е и правен и морален преседан, има излез.
Има решение за овој ваш денешен и пратенички и политички и личен морален дебакл.
Има можност за поправен веќе утре.
Има.
По ова вашето денеска, имате можност или за радикална корекција на оваа ваша денешна одлука со која ја поништувате актуелно најболната македонска болка или …
… или самораспуштетесе.
Ама веднаш. Уште утре, зашто, што би рекол Сократ: „Зарем не ви е срам“?