Published: Sunday, January 18, 2026 14:30
Зоран Иванов
Македонија нека не спие на картата од типот дека нашата надворешна политика е усогласена со таа на ЕУ како што деновиве зачестено верглаат од власта.
Ово посебно кога таа на ЕУ е политика без став или е политика на нејасни дневни пелтечења за Трамповите агресивни дипломатски, царински и воени хирови и кога не можат да погодат кое утео на која нога Трамп ќе стане и ако не можат дневно да се справуваат со неговите препотентни, тривијални и меѓународно неправни одлуки и со неговата пузли политика.
Но Македонија, токму како мала, немоќна и во глобалниве случувања невлијателна земја, има право и треба да може да има свој автономен и уникатно правичен став.
Треба навреме да се дистанцира од агресивното однесување на
Доналд спрема помалите и послабите.
Нашиот надлежен троец во ликовите на претседателката, премиерот и министерот за надворешни, на темава Трамп и неговата политика, неминовно, гледано и историски, треба да разберат дека Трамповите политики се неодржливи, дека се дејства со краток здив.
И дека неговата политика е политика на која бргу, сеʼ погласно и сеʼ помоќно ќе почнат да иʼ се спротивстават се уште жилавите демократски капацитети во самата САД но и во Европа и насекаде по светот зашто, на подолг рок, Трамповата американска политика која во својата суштина и не е американска, кај и да е, ќе доживее фијаско.
Затоа, наместо да се задскрива зад, нели, усогласената надворешна политика со таа на ЕУ, нашиот надлежен троец, во делот за Доналд Трамп, е добро да се изјасни со автономен македонски став и на темата Трамп, бргу да излезе од редот на Трамп.
Да излезе од редот на Трамповата колонијалистичка доктрина на владеење од позиција на моќ и да се нареди во редот каде што ние природно припаѓаме.
Во редот на меѓународното право.
Надворешната колонијална па и политика со нагласена доза на агресија на Доналд Трамп, не е автентичната американска надворешна политика и затоа неговата не смее да биде и наша македонска надворешна политика.
Оттука, би било препорачливо, македонскиот функционерски троец од погоре, така како што гордо влезе, сега бргу и уште по гордо, да излезе од редот на Трамп.
Да го напушти периметарот на непредвидливоста па и на непресметливоста на актуелниот претседател на САД кому, впрочем, мандатот не му е вечен па ниту ќе му е вечна и оваа негова уникатна надворешна политика.
Да го напушти и да го соопшти тоа јавно и гордо за светот да не`слушне.
Македонија да го пресретне времето на пост Путиновата и на пост Трамповата ера и за скорешното предвидливо време, на државата и на нацијата да и`обезбеди чист образ.
Да направи потег што демократскиот слободарски свет ќе го памети и кој историјата ќе го забележи.
И пак, од насловот – стратешки партнери нам ни се Соединетите американски држави, САД ни се, а не Доналд Трамп.