Зоран Иванов
Само ние.
Ние кротките, заблудени и смотани македонски граѓани кои, децении веќе, наместо европски стандарди, подлегнуваме на политички измами и на лажни патриотизми зад кои, всушност, блика корупцијата која ни ги изгоре децата.
Само ние. Ние сме виновни. Институциите се виновните.
Сите. Од првата до последната.
Владите се виновни. Од првата до оваа сегашнава.
Сите.
Тендерите и корупцијата се виновни. Јавашлук и грамзливоста се виновни.
Нашиот македонски систем вткаен од партизации и алчност е виновен.
Партиите политички се виновни што толерираат свои неспособни и некадарни криминогени кадри.
Ние граѓаните возрасни сме виновни што кога зборовите до властите ни одат во ветер, мотки в раце не земаме.
Ние сме виновните.
Да. Ние кои не сме во партиите и во нивните политики.
Виновни сме за потресната кочанска трагедија.
Виновни сме ние кротките, ние заблудени и смотани македонски граѓани.
Ние кои наместо европски стандарди, подлегнуваме на лажни патриотизми зад кои блуе корупција која ни ги изгоре децата.