Украинскиот град Луганск е под опсада на украинската војска. Поради жестоките престрелки градот е без вода и струја, а во прекин се и телефонските линии. Резиденцијалните и инфраструктурните објекти од утрината се мета на артилериски напади.
Поради безбедносни причини, набљудувачите на ОБСЕ ги напуштиле своите позиции. Повеќе од 400 украински војници и граничари во текот на ноќта пребегнале во Русија и побарале азил од руските власти, поради како што велат лошата логистика. Се жалат дека немаат муниција, вода и храна, а и онаа која ја добиваат е со поминат рок, додека официјален Киев демантира.
Украинскиот министер за одбрана Велериј Хелетај, во интервју за Би-Би-Си изјави дека украинските безбедносни сили се блиску до победа над проруските сепаратисти во источниот дел на земјата. Според Хелетај украинскита армија веќе бележи сериозен напредок против бунтовниците, чиј број моментално изнесува околу 15 илјади луѓе.
Во меѓувреме, руската армија започна 4-дневни воени вежби во централните и западните региони на земјата, вклучувајки ги областите во близина на границата со Украина. Во нив се вклучени и околу 100 воени авиони, како и неколку видови хеликоптери.